من طرف خوفي شَرَف البنادق..حميد
من تلحق رفيقك
يا بريق نجم
الحيارى
وإنت
لا نّور طريقك
لا شرق
فجر السهارى
...
...
من سَعَة
يا صحوة طلعك
غصَّة في حلق
الصحارى
حتى شال النمة
فرعك
دودى
زي وهج البشارة
قلنا
يا سعد المواسم
عودك المليان
جسارة
عودك الفجري
المصادم
بالبصيرات
والبصارى
مستحيل
يرضخ ..
يساوم ..
مهما كان الريح
حصارا
يفضل النخل
اليقاوم
في السقوط
نخل الفقارى
...
...
يا اندلاع
صوت الغفاري
في حلق دغش
الغلابى
لو خريفك
تاني يطرح
آهـِ
يا آخر سحابة
لما
يا شرف المواكب
يبقى
هم الناس
إمارة
تندحر
كل المناصب
ينكسر
كرسي الوزراة
...
...
كنتو وين
وين إنتو كنتو
كنتو ..
وين !؟
يا الفجأة بِنْتُو !؟
كنتو ..
وين ؟!
لمَّا الشوارع
ما ثبت قداما
مِرْتِق
نفضّت
صمت المسافة
مّدت
الشوق المضارع
للصباحات
التجرتق
كف شهيدا
البق مارق
من فَرقة الظلمة
فجرًا
تمَّ بي دموّ
الشرافة
وضمَّ حِضن الأرض
عاشق
...
...
كنتو وين ..!
وين انتو ..
كنتو ..؟!
...
...
لمَّا كان في سجنو
ثائر
بي جلافة السونكي
نومتو
ويصحى
بي أمر العساكر
قومتو
في الزنزانة
يمسح
بي بشاورة قلبِ
صابر
الجراحات البتنتح
هجمة الليل
والدرادر
من عصارة دمّو
يكتِب
أنبل الأشعار
لباكر
نمُّو يقفِل
غلبِ أمُّو
وتفتح السكّة
الحناجر
تقطع السجَّان
وسوطو
ويبقى فنانا
البساسق
...
...
كنتو ..
وين ..؟!
يا أهل الدِراية !
لما فضل الدين
عباية
تدبي
من كتف الغنايا
تنتصب
في الجو
طوابق
تنقلب
في التو
مغالق !
للبداهن
والبنافق
والبوافق
...
ولما كان
نفس العبايا
تنفَتِل بي قدرة
حبلاً
لي قصار
عُمر الكحايا
من جُنب تنسلا
سيفًا
عبّر السوَّاهو
سارق
شدة
الفقر الخرافي
حدة
الشغل اللي مافي
هدّة
الموت الإضافي
ومد لساناتن
سباليق
الخوازيق
الشواهق
...
...
كنتو وين ..؟!
لما البيوت
في الشمال
قامت خنادق
للكتابات البتنزل
فوق ضهاريهم
مطارق
لما طلاَّب الحقيقة
كانوا يختاروا
المشانق
ولما صوت الله
بموت في الجنوب
بين البنادق
...
...
آهِ يا وطني
المستَّف
في المطارات
القصيَّة
آه يا زمني
المنتَّف
في مدارات
القضيَّة
آهِ يا صمتي
المكتَّف
بالعبارات
النديَّة
آهي يا نبتي
الملطَّف
بالنهارات
الصديَّة
آهِ يا كفني
الملفلف
بي دواهي
بني أميَّة
آهِ من
رفع المصاحف
بالرماح الأجنبية
...
...
المعاطف
أجنبية
العواطف
أجنبية
الجلاليب
أجنبية
الدولايب
أجنبية
السراديب
أجنبية
السراير
أجنبية
المساير
أجنبية
صبة الكآس
أجنبية
ختت الرأس
أجنبية
رشة الدلكة
أجنبية
رعشة الفركة
أجنبية
طفية النور
جُنبية
والخوازيق
عربية
عربية
عربية
فضِّي نارك
يا محارب
ولاَّ
هات البندقية
غنِّي عشقك
يا صبية
احنا قدامك
مدارق
غنِّي للوطن
المفارق
عشت
يا وطني المبرَّق
بالندى
ولون المشارق
يامحرّق
يا مجرِّب
عشتَ بي
شرف البنادق
ويسقط
العفن ال بتلب
فوقنا
من شُرف الفنادق
يسقط
يسقط
يسقط .
بلدي القِبيل
ــــ
يا غربة جيت
كايسك براي
سايب وراي
بلدي أم نخيل
أنا كتَّ فرحان
بالسفر
فاكر السفر
شيتاً عديل
...
ما كتَّ قايلو
صحارى هم
لا فيها هدّاي
لا دليل
أنا كان عرفتو
أسى وندم
وحشة
وسهر ليلاً
طويل
ما كتَّ بفرح
بالسفر
لا كت بفكِّر
في الرحيل
...
سامع
حكاوي الناس
تقول
فيهو الخيال
والمستحيل
فيهو التهاتي
عليه العقول
والروح لعابه
قبل يسيل
...
وأنا عندي ليك
جواب وصول
يا بلدي
يا عشقي النبيل
أبداهو
بي وصف البلد
فعلاً عماره
عمار جميل
أسواق ..
بهارج ..
لأقصى حد
أصلي وبديل
وآخر موديل
فعلاً في مويا
وكهرباء
زي الزمن
ماشات عديل
جم كل مدرسة
مطيبة
وساحات مضوّي
نهار وليل
ما تشتهي الأنفس
هنا
تنقص عن الجنّة
بقليل
أرزاق
وفعلاً أمّنا
ما الله استجابو
دعاء الخليل
...
...
بس زولّه
بي دا
بيشتكي
وواشرِّي
يا داك الزويل
الطول حياتو
إبريق فكي
والما استراحوا
نهار وليل
...
لكِن أميركا
في أيِّ شي
وأمريكا
ما خشَّت فتيل
إلاَّ الفتيل
فاح منُّو شي
أشبه بزفرات
الخميل
...
لكن في شيطان
يا جنا
سامِنو بي أدب
الكفيل
جاط
المروّقة
بالخنا
ساط
بي خبوبُو
السلسبيل
مصَّر عرقنا
ودمّنا
وكايس يرِّقنا
مستحيل
...
...
سوداني
أنا
وإيك يا الأنا
لامِن تكون
عِرقاً أصيل
إنساني أنا
وما جيت هنا
أجلِب كرامتي
وأعيش ذليل
جابتني لي داركم
ظروف
بلدي
الدهوها
أوانطة
ليل
...
...
زي ما تقوم
تصحى
وتشوف
ديرتك ..
حلالك ..
لافحو سيل
وما ترضى
تتحمل
عذاب
أطفال
وحرمة بيت
كتيل
...
...
وتمرق
تقول
ما فيك مصاب
لا فيك تِباب
عابر سبيل
لا طار
ولا قرعة
وجراب
غير خير رجالتك
ما تشيل
فاهم
وإيدياتك خرُش
زي حبلِ
ما خِلَى من غسيل
تعرف تحش
تعرف تقش
طلاّع
وقرّاع للنخيل
أخدر ضراع
في النار تخش
هي مِي أحرَّ
من ذاك العويل
وتلك الدموع
النازلة أُش
من جوف وَفي
ولا زال أصيل
ود ناس
وما جرَّب يغش
وغير الله
ماب يخبِر كفيل
عاش العريبي
الفيّو
عاش
عاش زول
بداوة
وود قَبيل
والمسلم البيناتو
باش
شقِّيش عدلة
الصاح يميل
...
...
وشقيش نقبِّل
يا خطاي
الغربة موت
وبلادنا ويل
واليانكي
يا هُو أسباب أساي
وأسباب أساكي
وأحنَّ ديل
...
...
أولابنا أهلنا
هياك معاي
أنا سيفي كفِّي
وحتفي حيل
حيلاً
يشِد ساعِد غناي
لا عند بعانخي
الجِنِّو خيل
...
...
أنا نفسي
في بلدي الزمان
كانت بلدنا
قعد تشيل
غير ناسه
ناس
من كل بكان
قد كان
وكان
وشعاره فيل !
...
...
ويا الله كيف
ضاق بيها قول
قول
لا هُو مكري
ولا عميل
قولاً يقول
لي كلِّ زول
ليك حق مراكبي
في أيِّ نيل
...
...
يا روحي
لا تتهيَّجي
ولا تصقعيلي
حليل شليل
أنا ماني
في الباكر
يجي
أنا نفسي
في بلدي القِبيل
...
...
جوّاي صبر
قدر الشمش
ومهما الشمش
يغشاها ليل
ياها الشمش
واثقة وتمش
عادتني
بي نفسَا
الطويل .
ــــ
جايي أغنِّيها وأقول
طيبة زي قولة سلام
قاله تربالاً دغيش
لي مراكبيةً تجول
شاله كف الموج بشيش
لي بنياتاً بيردن
تمّن أزيار السبيل
ومدّن إيدن كورا .. كورا
رشرشن قلب الشتول
أدّن الطيّانة دورة
وشويمن تالا المدارس
خدَّرن كل الفصول
صفقّن هلا يا حبيبة
جايي أغنِّيها وأقول
طيبة جبّارة خواطر
وجنَّها الريح التطفِّر
للعصافير التكاجر
ما تعشعِش إلاَّ وين
في الحراز اليومو ماطر
ولاَّ بين سمرة النخل
التقدِّم تالا باكر
وكت أكون صبحان مسافر
زادة ليّا معَ الزوادة
صنّة بسمعا في البنادر
ماب أقول لك ما تساهر
ساهر السهر اليفيد
لاب أقول لك ما تظاهر
وإنت هسَّع كم شهيد
ماب أوصِّيك وإنت شاعر
تبقى عشرة على القصيد
تدِّي يوم الليلي باكر
أدّك الأطفال نشيد
إلاّ أقول لك أوعى حاذر
أحذر أولاد الحرام
المطاليق
المساليط
الخواذيق الضلام
وأحذرك صنت قبالي
وقمت تمِّيت الكلام
جايي أغنِّيها وأقول
داخلى فيِّ عديل وهيطة
زي وهاطة النيل وبرضو
مارقي منِّي هديل موالف
زي ولِف تربال على أرضو
علّمت شفّع غناي
يبقوا آفة متين ويرضو
وناس سمح جيبو ومجبّر
برّة داراته آب يعرضو
عرفتني على الفقارى
قالت إخواني الكبار
المظاليم الحيارى
قلت أخيّاني الصغار
أمِّي قالت أبوي مسافر
إلاَّ نومته بي مرارة
تصقع الحجر آعمارة
أرفع الحجر آعمارة
ولمّا تاوق بالعبارة
بي قدح مونتو وجسارتو
شفتو واقع من عمارة
القدح بي مونتو روّح
أمِّي ما لقت الجسارة
إلاّ وكتينا الكبرنا
وأدّت البلد البشارة
ويا بلد جيت مبتليبه
جيت أغنّي المن عيونكن
يبدا يومه وينتهيبه
التشيل الليل تذاكر
أو تفاكر في حبيبه
ينقطع ضهر القصائد
عند مريقته من وشينا
حلّة قرية مدينة ميناء
تمشي فوق أتره الغناوي
الأناشيد التقاوي
بالمواويل والحكاوي
سكة الجوع الخرافة
وتنتحِن لهة المسافة
ينقطع ضهر القصائد
الأناشيد الغناوي
المواويل الحكاوي
ينقطع ضهر المسافة
لمّا تقفرا بالمواكب
منصهر بالدم هتافه
والمواكب ما تجيبه
ينقطع ضهر المواكب
الأناشيد الغناوي
المواويل والحكاوي
ينقطع ضهر الحبيبة
وما تسيبه
جنّها وجن المهازل تتبرج
من إذاعات هراء
وجرائد إمِّعة
والدواخل تتفرج
في طنين الرؤساء
اليكفّي العالم التابع
موتاً ودماراً وفناء
تكفت الرادي وتذيع
لا دواء
أيها المرضى
لدى الزمن البنوكي
العتلي الذنيم
لا عليماً بك غيرك
كصغار الشعراء
أنت تنتفخين برداً
أو شموساً محرقات
وعواء
أنت تمتلئين هذا العام
جوعاً أو خواء
أنتِ ترتعدين صيفاً
يا بيوت الفقراء
أنتِ تحترقين
حتى أن يجئ
من يحيل النيل قسراً
نيل ماء
وينطلق ضهر القصائد
الأناشيد الغناوي
المواويل والحكاوي
بالحبيبة الخيرا زائد
ينطرح وجه الغلابة
يا إذاعات يا جرائد
والبلد فوق اللمليس
انطرح في خاطري باكر
وجيت أغنِّي لكم حبيبتي
إلاّ يا غبش العساكر
نتَّفت عصب الكمنجة
وصادرت منِّي الدفاتر
دخلت فيِّ الطبنجة
فرَّ من رأس غلبي شاعر
وركَّ فوق كتف الكلام
والعيون كانوا المحابر
هرَّب الشوق الحرام
من بيوتاً في المقابر
لي شموساً في الظلام
هاشم الأخضر سلام
التحيات النواضر
نبدا بي مين الرسالة
ونبدا من وين يا رفيق
عازّة فوق قيف البداية
وإنت في آخر الطريق
وإحنا بيناتكم محاصر
شوقنا بالريح والحريق
إحنا بيناتكم نصارع
زيّنا وزي الغريق
مرّة نمسك في المياه
مرّة في ضل الوطن
مرّة في عيدان حزينة
زنّت الريح في البحر
فنّت الريح من حراز
لما فطّاهو المطر
مرّة نمسك فينا آه
يا بحر مأساتنا آه
يا بحر مأساتنا بس
يا بحر مأساتنا فيق
يا بحر مأساتنا أوسع
أوسع أسّع ولاَّ ضيق
يا بحر بي غادي هاشم
هاشم التحراهو مين
هاشم الشكّعت فوقو
ريحك المزّع شراعو
موجك الصادربو شوقو
طوقو والزمن القضاهو
تالا هم باكر مسافر
ما رجف ساعة وداعو
هاشم السوِّيته فيهو
وسبتو يضرب بي كراعو
ما غرِق غرقت مراكبو
هاشم الأخضر ضراعو
ما يبِس يبست هدومو
ما حرق شومش شعاعو
وبقَّ كالحلم المصوبر
في الخواطر كوم أماني
هاشم العشم المعتّق
في خوابي الجوف أغاني
يا بحر تحراهو مين
يا بحر بي غادي زولاً
ماب ندلِّي الإيد بلاه
إيدو في إيد الرفاقة
وإيدو بي جاي في الرسن
ماشي في خاطر الغلابة
البيفصح والرطن
سار مقوِّنو التعابى وجايي
قاصدك يا وطن
والجا قاصدك كالزمن
ماب يصدنو العوارض
لاب يهدّنو المحن
ويا محن هاشم قمحنا
فأسنا كراسنا وقدحنا
هاشم المجروح جرحنا
هاشم الفرحان فرحنا
نلقى في زينّا وسمحنا
يوي وسي نغماً صدحنا
وفي ترحنا صبر ملحنا
نلقى في كل المراتع
في المزارع والمصانع
إيديه راية وفجر فاقع
في المدارس والمسارح
في البيوت فطن الشوارع
في الكنائس والجوامع
نلقى في كل المواقع
هاشم القاصدنو نحنا
هاشم الأخضر ضراعو
ما وقع يا نيل في فيضك
وإنت ماب يغباك شراعو
هاشم السمح المعافى
هاشم التسلم خطا
ويسلم الدرب الخطا
هاشم الكم لله أدّا
والبرادى تدور غطا
وشن غطاها بلا غطا
هاشم الحسن العطا
هاشم الحسن العطا
هاشم الصاح يا خطا
هاشم الحسَن العطا
سافر قبلنا وقلنا ليه
يا ماشي للوطن الوسيع
يا ماشي يا كم زول يجوا
يا جايي بي كم زول مشوا
يا ماشي في كم زول تصل
رسِّل سريع
وبلِّغ سلامنا
الشوق فظيع
سلِّم على المحجوب
وجوزيف والشفيع
سلِّم على حلمك محمد والمسيح
سلِّم على نفسك يا هاشم
ود جميع
من فات يوقِّينا الخطر
من قولب الحر والصقيع
بيناتو شان يطلع مطر
أو يحضن العالم ربيع
الناس بترحل قول لو ليه
شان حق يفضِّل ما يضيع
الناس بترحل كل يوم
والحق معاهو على العموم
الناس بترحل وماب تضيع
والحق بيفضل وماب يضيع
الحق حيرجع يا بلد
حقِّك حيرجع ليك وبيك
قوليها وإحنا معانا حق
الحق حيفضل يا قطيع
نتلاقى فوق قيف الفجر
بين التيقظ والهجيع
ويا إنتو يا نحنا
يا نحنا يا إنتو
يا أبّان ضميراً تاه
نتلاقى يوماً يوم
وبيناتنا حد الله
ويا إنتو يا نحنا
يا نحنا يا إنتو
يا نحنا يا المحنة
محنة
محنة
إحنا
يشوف القلب
ــــــ
القلبِ يشوف قبّال العين
من قبلِ أقابلك شفتك وين
في ياتو عريس مخضر إيدين
بين حضنو حلم يلصف لا وين
والناس في الدارة إتنين إتنين
كل خطوة تشيله عديلة وزين
قوق قمريتين فوق كروقتين
قيساب الشوق نوريقو متين
يا رش الغيم يا ريحة الطين
يا بختي أنا وكل الصابرين
يا زول يا زين أنا شفتك وين
في ياتو صباح باهي ووضّاح
الطير صدّاح للزهر الفاح
صفق البرسيم للطل مرتاح
والناس أرواح في حضرة راح
العشق الدغري العذري الصاح
يا قومة بدري وفوتة الدار
من أجل حلم راجنو صغار
في ياتو محطة غشاها قطار
إندهده فيها وقضّى نهار
حس العمال تحت الأمطار
الربط الخط ما فكَّ الخط
يا كم في الخط هيلا وأنفار
والناس النار أم قلباً حار
فتحوها بيوتن للسفّار
الزول الوافي العوّافي
يدِّيك العافي من المافي
وما يأخد إلاّ الأخبار
لاقيتك آهن لاقيتك
في سرِّي ندهتك ولبيتك
مع إنِّي ولا خابر إسمك
لا الجيهة المنها لابيتك
إنت الإنسان الغنيتك
إتمنوا الناس إتمنيتك
يا ريتك تخبر ياريتك
كم صبرِ وعشم إستنيتك
لو قبلِ أقابلك ما شفتك
ما كان في حزَّتي حبيتك
أنا وإنت قبل ده إتلاقينا
شقِّينا على الدنيا جداول
جبدنا زمانا الكان عاول
والعالم سوِّينا جنينة
يا رشة غيمة عتاميره
ربّة عربان وطنابيره
قندول الشوق الحين لبّن
جاب لي بيّوضة عصافيره
يا ريح الزنج إذا اشتاقت
تفتِق بأنفاسه مزاميره
يا القمحة السمحة المدخورة
قسِّيبته قلبي مطاميره
أنا شفتك وين ؟؟
قبلِ أقابلك
بين دنيا الريد ومقاديره
يا طالع الشجرة
وكتين تشِب لا فوق
في أول الأغصان
تلقى الحلم مشنوق
الليل بقالو كفن
يكسي الصباح خاذوق
...
القمري فرَّ وطار
فوق رأسنا خلَّف قوق
للفاتحة في الأشجار
واقفة النسائم روق
...
بي عِشُّو عصفت ريح
ريح المحن والعوق
فنّت جناهو جريح
بالعبرتين مخنوق
...
ويا عبرة الإنسان
يا زفرة المخلوق
في القطَّة والفيضان
ما يلقى غيرا علوق
...
...
يا الطالع الشجرة ...
جيب لي معاك خيمة
تستر من المطرة ...
كان كبّت الغيمة
*** ***
جيب لي معاك قمحات ...
قمحاتنا في الشيمة
وغنم الحلِب رايحات ...
ضلّمنا ضلِّيمة
*** ***
خيمة الشحودية ...
دفو ماب تدفِّيكا
لبن اليهودية ...
بلدك ينسّيكا
قمحاً من أمريكا ...
خازوق ضرب فيكا
غير خير بواديكا ...
مافي اليكفِّيكا
*** ***
يا الطالع الشجرة ...
من خيمتك التوبة
جيب لك فروع خدرة ...
أو جافّة يا دوبه
في الحرّة في المطرة ...
في عِز برِد طوبة
نمرق من الوكرة ...
وتبقالنا راكوبة
*** ***
يا الطالع الشجرة ...
قبّل على الحلَّة
قول ليها يوم بكرة ...
كربتنا تنحلّه
ننزل نضوِّيكي ..
ضرعاتنا ما دِلّه
قادرين نسوِّيكي ...
عُقبان على الله
*** ***
الحاجي والصُرمة
كربة زمن زلّه
الجايي يا يمّة
لا كلا .. لا ملا
شال رايَم الضلمة
وطين ساسك إنبله
ومن لمّة جات أمّة
وبنيانك إنعلاَّ
*** ***
شفناهو يا يمة
شوف عين قَبَل والله
فجّابِك الغُمَّة
فجاَّجِك الطلَّة
*** ***
يا الطالع الشجرة ...
طوّلنا يا ولاَّ
أنزل هيا ويلاَّ
إندلَّى نندلَّى
نندلّى سودانَّا
سودانَّا ما دلَّه
دام ربَّنا أدَّانا
يلاَّك علي الله
*** ***
بينما نحن نقاسي بين رمضاء الماسي
و أقاصي المقبرة … فأجتنا اتبرا
فإذا بالمقبرة تتنامى سنبلات
و الماسي قبرة
دوزنوا لحن المبادي فالأيادي حنجرة
لونوا قوس الأماسي كيف كاسي محبرة
وطني … أو اتبرا
خلف ليلاي قصاصي أي فجراً يا ترى
وطني … أو اتبرا
اتبرا الطيبة يا منجم الثورات
كيفك بعد غيبة وغربة ووطئ جمرات
رجالتك الهيبة … نسوانك الحارات
قالن لي قولا تسر … تنفع زمان الضر
كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوعو كان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهان وجهدية .. وكابات هي ما هيّ
حموني اغرودة والدنيا عيدية
حرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرح ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. والقيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. بي طرحة و أمنية
ربطن لي جرحاتي .. وبي مرتق واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية
نار التكل ماتت .. نار فينا شن حية
و روحك إذا فاتت .. روح الوطن جية
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في عب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولنلو نحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن ح###### الويحيد .. وضرعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان يحكمونا بيوت .. لو بحكمونا أفراد
حارين حديث الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوط .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طال للبراد
الشغلو الكلو زيوت .. ما يلقى زيت لا زاد
ما يلقى الطِّري .. وضاقنبو السبل
العجل العري .. النار والبقل
خيري وسكري .. في الدقن ام قمل
يا الدقن ام قمل
شيلي وصدري .. وجيبي دمار دبل
زير ولباش كيري .. شامبو دلال وفل
غني وشكري .. يا كوز المثل
في الضيق منهري .. وحمدك الربل
وبت السمكري .. جيهتك للرجل
دهناً كركري .. الطلح الكحل
هوي يا العسكري .. غيرك من قبل
عامل فنجري .. وفاكر الناس هبل
بى اسم الدين يطل .. وبى أسمى المثل
يرغي وينفعل .. ضاحك بالعقل
ما داعب طفل .. لو..لو قالو كل
ينفرطق نعل .. في المرة والرجل
قاصد ننشغل بي سنن الغسل
عن موية وأكل .. لا توب لا في ضل
نقعد ننكتل .. في اوصاف الرسل
مين برعى الإبل .. وتبرا الغيمة ضل
والمن دوب طفل .. يفتي ويشفي غل
والوكتين يطل .. يلفح للعقل
حيلتك ما بتحل .. في فكرك عطل
زهدنا فاض فضل .. وما ناقصين مثل
وين يوجعنا وين .. ماك داريبو كل
ما شعنف دقين .. شنف حالنا ذل
عيشة يا مفتري .. ويوم كامل شغل
نسرق ننكري .. ولا بلاش تكل
غني وشكري .. يا كوز الدبل
زير ولباش كيري .. والآية بــ رطل
بس يا عسكري ..
يا عسكري التالفين .. ويا تالف العسكر
يا لايصاً في يمين .. والشعب قد أيسر
ما جف ساق ابريل .. اكتوبر الأخضر
يات شيمة ليهو تشيل .. كل ما الرياح تكتر
فرعو الهطيط بيميل .. بس ما بينكسر
يتسامى دغري عديل .. كلما الرياح تنتر
طير الخطى الجايين .. ما بتفزعو الهزات
لا صقورك النازات ..
من دم رعاف الطين .. ودنس الحياة ام لذات
فاكر رقبتك مين ... وفاكرنا مين بالذات
دي القرشي .. قاسم أمين .. ويا دا الشفيع ما فات
وما اعظم الجايين .. يا اتبره وجايات
حاضرنا ما ضنّين .. وكل الدروب صاحيات
يا لابساً كم وش .. على مين تدور وتحوم
شغلك ضلالي وغش .. نضمك عسل مسموم
قاصد عيونو تتش .. ويرغى البلد مقسوم
طقّت جبهتو شمس .. فارت في راسو دموم
الجاي بعدو يمش .. يعتب بعيد مكروم
تطفش طيورو تطش .. وبومك يعشعش شوم
يا ضاحكاً غياظ .. لي شعبك المأزوم
ظنك ليالي حراز .. ما دلدل الخروم
في مزارعو .. لافي رذاذ .. لاغيمة طاشة تحوم
لا زيت ولا أمباز .. قطّن مصانعو عموم
وانعكنن الإفراز .. وقد بلغت الحلقوم
وبرضك تنوني انقاذ .. ينقذنا منك يوم
بيناتو نمشي عزاز .. زي النبي المختوم
يا ضاحكاً غياظ .. لي شعبك المأزوم
من دكة التلفاز .. دايماً تطل ملخوم
وتنطاير الإنقاذ .. وزبدك يرك متخوم
عرب الكنانة حجاز .. مستقبلن مهموم
عشمان في كوتة جاز .. عربونا كم قدوم
من لذتك تنحاز .. مع غزو ما له لزوم
كان ماك نتن لذاذ .. فتان ولخبات كوم
شن غزتك في عكاظ .. شعب الكويت مو الروم
لا قصباً لا عكاز .. وقت الدميرة تقوم
لاك نافعاً حجاز .. وشن للعتاب واللوم
فوق العليك لاواز .. تشهد سما الخرطوم
غماز ويا لماز .. هماز ويا مفصوم
ما الفرق بين ملوك .. كادى الرعية تلوك
وعسكر وراهو بنوك .. ساوى الغلابا حنوك
طول النهار عوك .. عوك والليل تراب وصكوك
تملا وتفضي تنوك وتملص ضميرا هنوك
واسترني يا المبروك متل التكني أبوك
ناس بي أخوي وأخوك لا اخلاق لا دين لا سلوك
اخلاق ..دين وسلوك
يرمي الولد في الشوك أما البلد مشكوك
يا شعب يسلم فوك .. عطفك رضاك وعفوك
قول للخزين صل صوم ولا تنكسر مهزوم
ولو فضلت الخرطوم من تصحى قبل الطير
بعد النجيمة تنوم
ومنعاشى يا طيبة بخير مكفية راجية اليوم
ممنوع عليها السير غير لى كبار القوم
والسادة الأمجاد ..
لابد من يجي يوم ساعاتو ما ها بعاد
يجي من صراع اضداد
من امة حق الموت ما لا قيا وانتو سعاد
قول للدعي المتخوم
يا متفن التفاح .. وشغلك قيافة ونوم
في شعبك الكداح .. وفي أطفال مو لاقى الدوم
يا أرزقي ومرتاح .. ما جابهنو هموم
جاييك زمن كتاح .. جاياك رياح وغيوم
جاياك مطور الصاح .. جاي الصح المعلوم
من كل فج في كفاح ..ومو وحدا الخرطوم
البيننا بينك دم .. تاراً غريق وجراح
فينا البحرفو السم .. فينا البكفو سلاح
شهدانا ما قت كم ... لا ياتو فيها فلاح
لا ارتحت شلت الهم .. لكنو يا سفاح
لا الإندلق بنخم .. لا بتتوزوز أرواح
ان النفوس جم .. جم
ود الفضل ما راح .. وما طال فينا شهيد
عصيان وإضرابات .. ما بنفع التشريد
لا بجدي صالح خاص .. لا مسخك الشعبي
وغنايك الرقاص .. لا دفاعك الحزبي
لا حيلة ابن العاص .. لا السجن لا التهديد
يابوت ولاد الناس أشراف وما بتنداس ..
ما بمشي فيها وعيد .. وفيها الوعد متراس ..
فيها العشق صنديد .. وصاد أعزلاً دواس ..
يا أرذلاً رعديد .. يا أبخس الأنجاس
وسع مجاري الدم .. زيد السجن ترباس
يا هالكاً مجراس .. مصاص خزا ومصاص
خازوق بني العباس ..
زي ما انت عندك دين افريقيا ليها تراث
وكان تنهري وتنغاظ .. عبداللطيف والماظ ..
ما حرضم النخاس
يا رباية المنظمة .. المريبة المسجمة
دي البلد طيبة ملهمة .. ما بتزوّر ملاحما
كنتِ خدرا ومنسمة .. جنة طيبات مواسما
يا ارض جاك مسيلمة .. في ايدو كيزان مخرمة
فاضية فاضية ومعلمة الله من دين ولا انتما
بين دهاليز مضلمة .. وبي مراويد مسممة
تشتك وانتي مرغمة .. يا أرض صابك العمى
وكل شيء طار السما .. إلا المطر طار من السما
وما اكتفى السفه انعما .. دكن السفة دردمة
وقال نشرع نأسلما .. وفي البداية النقسما
ويا كضب .. لا بتقسما .. لا بتقدر تأسلما
ويا كضب .. لا دا بلسما .. لا ترابيك مرهما
كلكم ملة مجرمة .. والبلد في البيكرما
في الغلابة المنظمة .. في نقابات مصادمة
أو جماعات مقاومة .. من خصوم المساومة
واللا أحزاب مصمة .. سلطة الفرد تهدما
من أساسا وترايما .. وبالبنوك المرمرمة
من عرقنا ومخمخمة .. مافي خير غير نأمما
إلا وجعة ملاحما .. الغلابة المألمة
تنزع السلطة بالدمى .. وأي ثورة نقيما
الكروش المنعمة .. كش تلملم تخمخما
تصحى ذاتا المرخمة .. وللعساكر تسلما
دايرة فعلاً مأزمة .. إلا لابد لازما
يا الغلابة المأزمة .. من تجارب تعلما
من دروباً تقدما .. والديمقراطي أسلما
هو البوضح معالما .. والمعالم تفهما
إنو سبة مظالما .. في الارض ماهي في السما
ولو دي أفضل عوالما .. يبقى في خيلها مكرمة
ولو دي أفضل عوالما .. يبقى غييرا لازما
وعِن تلملم عزائما .. غيرا ما بيبقي حاكما
شعبنا وفارس الحمى .. ينطلق بي ملاحما
تصبح الدنيا سالمة .. والخلائق مسالما
الحبيب للحبيبة ما .. من عساكر نقاسما
شعبنا وفارس الحمى .. ينفرد بي ملاحما
الحبيب للحبيبة ما .. للعوارض يقاسما
منك براء .. ألديش إيمانو والإخلاص
يا سم بنوك العيش .. يا أرزقي ولحاس
ايد تقبض البقشيش .. وايد ترشي للحراس
يا كرشك القدر ايش .. واكبر فراغ الراس
ماك جايي منقذ ايش داعي الهلاك للناس
شن داعي للفتيش .. حالة الطواريء وفاس
حظر التجول ليش .. ليش كتمة الأنفاس
وليش جايي أصلاً ليش .. يا جايي من غير ساس
ما قابلك دقيش .. جوة القطر .. في الباص
حال حلة تشكي دغيش .. ما عشتو ها الإحساس
لا جُعْ لبست الخيش .. لا سهدك قراص
أطفال حفايا تكوس .. للموية في الحصحاص
يوم ما لبست البوت .. في هيصة الأعراس
تعب البرد والصيف .. حمى النفس والراس
طيب حتقدر كيف .. تلمس قضايا الناس
نار المدن والريف .. الضمة ما بتنقاس
كم نفنفت نفنيف والأقوى منك فات
فاكر الحكم طرطيش .. والسلطة قوة راس
كتيل رقاب في دغيش .. حميس جهالة حماس
مو رقصة يا درويش .. عليق بخور ونحاس
ملينا شعب وديش .. ملو الأرض والفاس
الهبة تبقى بشيش .. والحيطة من فد ساس
قول للحرامي بريش .. حلتنا مو تكساس
دم اخويا مو معليش .. وانا ماني نايم حاس
وين تمشي وين شقيش .. اترك برا القصاص
واهلي الغبش ديش ديش .. وكل البلد حراس
ديل نحنا مانا قريش .. وماك ود اخو العباس
والشعب ماهو قشيش .. حالك يصيدو يباس
وسوداننا ماهو حويش .. بيقفلو وبي ترباس
اماتي يا أمات .. قولن لكل عنيد على شعبنا وعاناد
قولنلو نحنا حديد زي المرمة شداد
وين تمشي يا رعديد .. وانا يا دا يا جلاد
جيت من قريب وبعيد .. من ادنى قول في البيد
وآخر فرع غابات
هبة رجال و ولاد
نسوان عزاز وبنات
أجداد وحبوبات
جيتك بكل جنس .. أحيانا والأموات
جيتك بكل لغة .. رطان وصاحب ضاد
جيتك هجمة السيل .. مطراً بلا ميعاد
لكني ما جيت ليل .. جيت في الضحى الوقاد
وما فوقي إلا نشيد ..
وما تحتي إلا ثبات ..
ما في إيدي إلا الأيد شعباً جنا حوبات
وين تمشو يا أوغاد ..يا شرزمة كابات
خانت ثرى الأجداد
بي 300 زول في خمشة دبابات
بدل البطمن خوف وبدل البيلم شتات
بدل البسند الجوف صفيق ومؤتمرات
بدل المدارس جات تملأ البلد ثكنات
بدل القلم رصاص بدل الفهم خوذات
محضر بدل كراس جيهة النشيد غارات
حس رنة الاجراس ابواق وصفارات
تمريناً للجمباز
بدل الشباطة ابوات الحصة كتم انفاس
درس العصر كشات
فتش بيوت الناس واستجوب الاموات
جز الفرع بالفاس ام العرق هيهات
انقاذ وما ادراك انقاذنا الاهلاك
انجاز وما اسماك تكويشة الملاك
يا مسخرة مأفون ترباية السفاك
يا مدعي وافاك زمبارات القصبة
حيكومتكم كعبه
بموروث الشعب والبسملة مغتصبة
ضراعات العمال الزراع الكتبة
سارقين لبس الديش باسم الشعب الطلبة
يا شناق القول يا ربط العقبة
يا خناق الزول يا كسار الرقبة
كنا بنأكل فول نرجى الله في الكربة
مر علينا الحول ضِقنا وضُقنا الادبة
وانت تجب كف كف تنضم لمن تغبى
مؤتمرات السف شكل لجان الضيبه
شنفت الاحزاب قت كوفية وعذبة
الجمعية ضراب زي الما منتخبة
حق الله الاضراب وأي حقوق مكتسبة
قلتو سياسة غاب
طيب لية يا كذبة ما وفرتو القوت ها الحالة الصعبة
ما وقفتو الموت والنهب البى قلبة
دقن فرشة البوت فوق جوطة وغلبة
ولانزيف الدم منو عمارة وعربة
وشر العيشة الغم ليكم خير يا كسبة
كسبة وضلاليين لي بنوكم الخربة
تحيو وحلاليين وللغير حرام وربا
السلطة للاحزاب الشعب ساقا غبا
ولح######م ده ثواب جاء من الله جابو هبة
بجيهة الله الجاب وبجيهة الله ابى
لي بيتو انتو قراب من بحرى بقببا
تنفرج امدرمان والمهدى في الكنبه
تنشايت ام ضبان ود الترابى وباء
فوق تربة السودان في ضرايحو كم غرباء
يا ملعبة كيزان دنيا وبلاش غلبة
وجيتاً ظهرتي بيان يا اتبرا التعبة
ما ضاقت الاديان والدنيا كم رحبة
وفي حضرتك فتيان ما بدلت جببا
الدروشة الغليان الهمهمات غضبا
وكم دوبت بمبان بمواقفا الصلبة
يا ملطشة فرعون
موسى الشوارع عاد
وعلى مين تحلقوا دقون كان اتخلقتو جداد
الشعب كلو عيون الأمة بالارصاد
اللي ضميمتو يخون ما امنوهو بلاد
وكان بيحكمونا بيوت لو بيحكمونا افراد
يا شعبنا الوقاد يا صاحب اعتى جهاد
يا ابن الغلابة الحر يا جيهة يا مشهاد
كتر السكات بيضر وقت المهادنة فات
بيك يا النضال المر تحلى البواكر هات
ايدك لعالم حر والتنهض الكلامات
طول ما الضلالة تضر زي ما هى جات بتمر
يا مفدر الظلمات يبقى اللقى بيسر
والمهدى حي ما مات
يا اتبرا الِبرة يا منجم الثورات
اتبرا ……. اتبرا همس شوق shareefشَرَف البنادق..حميد
» صباح الخير
» كلمات الفنانة حنان النيل
» فضل يوم الجمعة2
» فضل يوم الجمعة
» كلمات أغاني عميد الفن الأستاذ أحمد المصطفى
» دور ومكانة المرأة فى الإسلام الى الدرة المكنونة و الجوهره المصونة
» دور ومكانة المرأة فى الإسلام
» [تم الحل]اقدار وووووو مع مجذوب انسة