واحة محمد سالم حميد

قوم يا خال

محمد الحسن سالم (حميد)

قوم صحي نضال ... عمال البلد أم خير يا خالْ
صحي الكُدّاح .. الوين ترتاح .. والحال بطالْ
صحي التربال .. والأرض الطيبة الكم خاواها وضادا النالْ
اليوت شغال في نهارو وليل ... منهوك الحيل تحت الراسمالْ
آه الراسمال الياما قسى وعوّق رجّالْ
ما خّلا نساء .. وعرك الأطفالْ
لا مسلم قال .. ده آ خيي بلالْ
نصراني يحن في قبريالْ
لا يمين في يمين ... لا شمال في شمالْ
دولار وريال ... دوار يا خيالْ
تجويع وإذلالْ
خرّب واغتال كل الآمالْ
ما تخلي مجال دون إستغلالْ
السلب حلال .. النهب حلال .. والصلب حلالْ
هدِّم لذات المسهوكين من أجل الذات .. مكينيزم انتاجْ
ابراج العاجْ
هيصة المكياجْ
ديباج التّاجْ
السيخي الصاجْ
زي اعتى سياجْ
يتلقى افواج المسحوقين في الليل الدّاجْ
المسيوقين تحت الكرباجْ
اخوان اصرارك يا حّلاجْ
على انو الليل بِلْد الفجّاجْ
وضربة محتاج في نهاراً ساجْ
أبتر من سن سيف الَحجّاجْ
الله يا الزول الساقو عُزال
اطرى الإذلال يا دغري عديل بيصارع الويل حيّاً ما زالْ
بالصبر يشيل في الما بنشالْ
ما انيقّن وقال يا دنيا محال ينصلح الحالْ
بل عبّا وشال جواهو الفالْ
نازل وديان طالعبو جبالْ
أشواك ورمال غابات ووعر .. بين ريح ومطر .. عِرْق الشّلالْ
ومطّامِن بال .. ما لاوز قال يا ربي أصد من دربي الطّالْ
ما طال لا بد يشرق بكراهو الما بنطالْ
يشرق بالخير .. بالحب .. بالود .. يشرق لا بدّ يضوي الحَلاّلْ
إزي يا خال ... كيفنو الحال .. زين عال العالْ ؟؟؟
مع انو الحال ما راجي سؤالْ
ايجار البيت ... جيهة الأطفالْ
مشهاد اليوم عيشة الدوبالْ
أفراح العيد على روحو وبالْ
عكّر لي الفوق أداهو إذلالْ
والخوف ام زين ان صابا زلالْ
الله يا زول مشغول البالْ
في الدنيا يكون ما في استغلال
والشوق رايات ... الله يا زول ... الشوق رايات
والله على ناس كلها احساس ..
انو الجايات اجمل والفات ما فات والفأس
والارض البكرة الفكرة .. الراس
الختة اساس الليلة وبكرة .. اعظم ميراثْ
أجمل من ده واعظم بكثير ..
عالمنا يصير ما فيهو اجير..
لا ناس فوق لا طيطي راسْ
يبقى المقياس الشغل التام بي وفا واخلاصْ
الخاص للعام والعام للخاصْ
والشوق قدام .. الشوق قدام ...
والخوف ينداس تحت الاقدام ..
كابوس البؤس نلقالو خلاصْ
اصلاً يا خال ... شفقة راس مالْ
اما العمال انفاسا طوالْ
وان طابو نفوس .. ان طال البالْ
ضي الفانوس بيكفي جبالْ
حدك يا رصاص .. ما دارلو دواس ولا حتى كباس
عالم كالشوق وحق كل الناس
الا الكداس .. عاكاس .. عاكاس
شان دفتر شيك بسرق كراس
واحنا الوراث كلنا حراس
والجاي يدوس عزنا بنداس
اصلو السواي تب مو حداث
يا حب إنداح على كل قليب
إنزاح يا نواح .. دندن يا دليب
بأغلى أنغام .. ويا خطوي ارتاح على أحلى دريب
قدام قدام في امان وسلام
يا عالم كون بالود مسكون ... قوام قوام
قوماك يا خال .. حلاّل حلاّل .. باشواقنا نطوفْ
الدنيا نشوف اشجار الفال الدانية قطوفْ
شان يربى طفل لا غم لا خوفْ
وإن قالا بِغِمْ ما يلقى دبيس لا هملي وهم
وخاطر مكسوف ينعشى يبيت على صوت الأم
شان باشي تعم
من بيت لى بيت ... يا بكره يا ريت ... غنواتنا طُعم
والعالم خيط .. والقابض كان ذات مرة حلم
والرامي انسان ما انيقن شان الدنيا زمان قالتلو أبيت
ويا عالم كون بالود مسكون .. كون حُرمة بيت
رَتّاي وحنونْ
ويبقى الدناميت من أجل طريق يمشيبو دقيق أو قطرة زيت
للصابر فوق ما فكّ الريق .. يا سابق الصوت من تنزل موت يا ريت خبيت
فوق كتف الشوق لى حال مفتوق بي إبرة وخيت
وعلشان ده يكون .. قوم حييّ نضالْ
عمال البلد أم خير يا خالْ